- კულინარიული აღმოჩენების დროა!
- ჩაინიშნეთ და შეაფასეთ საყვარელი რეცეპტები
- გაუზიარეთ სხვებსაც საკუთარი კულინარიული შემოქმედება
განსაკუთრებით გემრიელი ტკბილეული, რომელიც შემოდგომაზე დიდი ხალისითა და სიყვარულით მზადდება. მისი მომზადება არც თუ ისე რთულია. თუმცა, შედეგი ნებისმიერ სირთულედ ნამდვილად ღირს :)
ამ რჩევაში იხილავთ როგორ გააკეთოთ თხილისა და ნიგვზის ჩურჩხელა.
მოცემული ინგრედიენტებით გამოდის, დაახლოებით, 4 თხილისა და 4 ნიგვზის ჩურჩხელა.
დაგვჭირდება:
- 50 ცალი ნიგოზი
- 100 ცალი თხილი
- 1.5 ლიტრი ბადაგი
- 300 გრ ფქვილი
- 3 ჩ/კ შაქარი
- ნემსი
- მაგარი ძაფი
ბადაგის, ფქვილისა და შაქრის რაოდენობა საკმარისია ჩურჩხელების ერთჯერადად ამოსავლებად. ჩურჩხელები, სულ მცირე, 2–ჯერ მაინც უნდა ამოვავლოთ.
ნიგოზი გაარჩიეთ. მოათავსეთ ცხელ ტაფაზე და დაბალ ტემპერატურაზე 2–3 წუთით მოხალეთ ისე, რომ არ დაიწვას. გადმოდგით გაზქურიდან და გააგრილეთ. ლებნები შუაზე გაყავით.
თხილი გაარჩიეთ და ცხელ ტაფაზე 2–3 წუთით მოხალეთ. ხის კოვზით მუდვმივად ურიეთ, რომ კანი მოშორდეს. თბილ თხილს კანი ხელით მოაშორეთ.
დაგჭირდებათ ნემსი და 75 სმ მაგარი ძაფი. ძაფი ორად გაკეცეთ და ნიგოზი ააცვით. ლებნების ბრტყელი მხარე ზემოთ უნდა იყოს მიმართული. ერთ ძაფზე 25 ცალი ლებანი ააგეთ. მოაჭერით ნემსი და ბოლო განასკვეთ.
75 სმ სიგრძის ძაფი ორად მოკეცეთ. თხილი ნემსით ძაფზე ააცვით – თითოეულ ძაფზე 25 ცალი თხილის გული. მოაჭერით ნემსი და განასკვეთ.
ფქვილი და შაქარი თასში მოათავსეთ. თანდათანობით შეურიეთ 500 მლ ბადაგი და ხის კოვზით მოურიეთ.
ათქვიფეთ ელექტრო ბლენდერით, რომ ნაზავი ერთგვაროვანი გამოვიდეს.
1 ლიტრი ბადაგი ღრმა ქვაბში მოათავსეთ და თანდათანობით შეურიეთ ფქვილის, შაქრისა და ბადაგის ნაზავი. კარგად მოურიეთ.
გააცხელეთ მაღალ ტემპერატურაზე. ურიეთ მუდივად. აადუღეთ. შეამცირეთ ტემპერატურა და დაბალ ცეცხლზე 8–10 წუთით ადუღეთ. თათარა ნელ–ნელა გასქელდება.
საბოლოოდ, თათარას ისეთი სისქე უნდა ჰქონდეს, როგორიც სურათზეა ნაჩვენები.
ხელი მოკიდეთ ძაფის ბოლოს, ნიგვზის/თხილის ასხმა თათარაში მოათავსეთ და კოვზის დახმარებით ნელ–ნელა თათარაში ჩაფალით.
დარწმუნდით რომ ნიგოზი/თხილი ბოლომდე დაიფარა და ამოიღეთ თათარადან.
თუ თათარა სწორადაა მომზადებული ჩურჩხელა წვეთას არ დაიწყებს. ჩურჩხელები გასაშრობად დაკიდეთ. შეგიძლიათ, ჩამოკიდოთ ორ სკამს შორის გადებულ ჯოხზე.
ჩურჩხელები მზეზე 3–4 დღით გააშრეთ, სანამ წებოვანი აღარ იქნება. 3–4 დღის შემდეგ, თავიდან ამოავლეთ თათარაში. თათარა ისევ ისე მოამზადეთ, როგორც ზემოთაა აღწერილი, მხოლოდ ერთი განსხვავებით: ბადაგის რაოდენობა 2 ლიტრამდე გაზარდეთ. მეორედ ამოვლების შემდეგაც ჩურჩხელები მზეზე კიდევ 3–4 დღით გააშრეთ. შეგიძლიათ, ჩურჩეხელების ამოვლების პროცესი კიდევ რამდენჯერმე გაიმეოროთ. როცა ჩურჩხელები ბოლომდე გაშრება მისართმევადაც მზად არის. შეინახეთ მშრალ ადგილას 2–3 თვემდე. შენახულ ჩურჩხელას ზედაპირზე შაქრის თხელი ფენა უჩნდება – ეს ბუნებრივია, თანაც ჩურჩხელას უფრო ლამაზს და გემრიელს ხდის.
კომენტარები
ბოლოს განთავსებული
კატეგორიები
მსგავსი რჩევები
