მრავალმა მომხმარებელმა თქვა უარი ბოთლის ლუდზე და ქილის ლუდის მომხმარებელი გახდა. კომპანიები ამ ადამიანების მისაზიდად და შესანარჩუნებლად სტანდარტული ბოთლის გარდა ლუდს უშვებენ ორიგინალური გაფორმების ქილის შეფუთვებშიც. ეს ტენდენცია კი უფრო მეტად ამწვავებს ლუდის მოყვარულთა რიგებში იმ დავას, რომელიც შემდეგ კითხვას ეფუძნება: რომელია უკეთესი – ქილის ლუდი თუ ბოთლის ლუდი?

ალუმინის შეფუთვა იცავს ლუდს მზის ულტრაიისფერი სხივების მავნე ზემოქმედებისაგან და ბევრისთვის მისი შეფუთვა უფრო მოსახერხებელიცაა. რამდენჯერ დაგილევიათ მზეში ბოთლის ლუდი? ალბათ სმის პროცესშივე გიგრძვნიათ ცვლილება ხარისხში. სხვა დროს გაითვალისწინეთ და ექსკურსია იქნება ეს თუ სხვა რაიმე შეკრება დღისით, მზისით, ბოთლის ლუდს ქილის ლუდი არჩიეთ.

თუ დაგილევიათ ქილის ლუდი, შეიძლება ალუმინის გემო და სუნიც გიგრძვნიათ და შესაძლოა სწორედ ამ მიზეზით უპირატესობა ისევ ბოთლის ლუდისთვის მიგინიჭებიათ. ნუ ჩქარობთ, გაითვალისწინეთ, რომ ქილიდან ლუდის დალევისას თქვენი ტუჩები ალუმინს ეხება და ცხვირიც იქვე, ახლოს გაქვთ. ლუდს ტყუილად ნუ დაადანაშაულებთ, გადაასხით ჭიქაში, დალიეთ და მიხვდებით, რომ ალუმინს მისთვის არაფერი დაუშავებია.

ქილის ლუდისადმი გარკვეული უარყოფითი წარმოდგენა დასავლეთის ქვეყნებში ჩამოაყალიბა იმ ფაქტორმაც, რომ დაბალხარისხიანი ლუდის მწარმოებლები თავიანთ პროდუქციას უმეტესად მხოლოდ ალუმინის შეფუთვით უშვებდნენ.